والغسالة بتلف، وتلف، وتلف

ترررررن

واحدة سنووز... ترررررن... كمان شوية.... تررررن... كمان واحدة سنووز...

يللا يا بني عل الشغل....

مفيش ابتسامة... يا دي النيلة رايح الشغل... امتى الويك اند بقى... 

دوش سخن... مكنة حلاقة...

قميص أبيض مالغسالة عل البدلة والكرافته اللي بتخنق...

يعني لازم اللبس ده للشغل؟ 

الشارع زحمة... واحد بيكسر... مش تفتح يا أعمى؟!

قهوة مظبوط يا عم...

الساعة لسه 12... اليوم مش بيخلص ليه؟!

لم الحاجة.. الساعة بقت 4:30...

القميص بقى رمادي... والكرافته مفكوكة...

يللا قابلني عل القهوة...

ﻷ يا حبيبتي مليش نفس أروح الفرح...

ايه القطوع؟ 

مين الكينج؟

شاي خمسينة يظبط...

ﻷ كفاية.. بكرة شغل...

القميص بقى أسود... والكرافته مقلوعة...

الغسالة بتلف... القميص جواها..

عشان صاحبنا بكرة عنده شغل...

والغسالة بتلف، وتلف، وتلف....